Home TRENDING అంకితభావంతో ఎనిమిది మంది ప్రాణాలను కాపాడిన సామాన్యుడి కథ.

అంకితభావంతో ఎనిమిది మంది ప్రాణాలను కాపాడిన సామాన్యుడి కథ.

వరుణ్, బెంగుళూరుకు చెందిన 31 ఏళ్ల ఫార్మా ప్రొఫెషనల్. పోయిన ఏడాది అతను కరోనా లాక్ డౌన్ వల్ల ఇబ్బందిపడిన వలస కార్మికులకు, పోలీసు అధికారులకు అందించిన సేవలు నెటిజన్లకు పరిచయమే.

ఇప్పుడు కరోనా మహమ్మారి రెండోసారి విజృంభించిన తరుణంలో వరుణ్ తిరిగి తన సేవలు మొదలుపెట్టారు. కరోనా రోగులకు ఆసుపత్రుల్లో పడకలు ఏర్పాటు చేయడం దగ్గర్నుంచి, ఆపదలో ఉన్నవారికి అవసరమైన సాయం అందించడం వరకు ఈ కష్ట సమయంలో ప్రజలకు అండగా ఉంటున్నారు వరుణ్.

ఇది ఇలా ఉండగా, చాలామంది ఆక్సిజన్ కోసం, మెడిసిన్ కోసం ట్విట్టర్లో ఒకరినొకరు సహాయం అడగటం తెలిసిందే. గత రాత్రి ఇలాంటిదే ఒక ట్వీట్ వరుణ్ కంటపడింది.

ఆ ట్వీట్ వివరాలు ఇలా ఉన్నాయి – బెంగళూరు ఆసుపత్రిలో రోగులకు ఆక్సిజన్ సరఫరా కోసం SOS పంపబడింది. ఎనిమిది మంది రోగులు ఆక్సిజన్ ఆధారం మీద ఉన్నారని, మరో 60 నిమిషాల సరఫరా మాత్రమే మిగిలి ఉందని ఆ ట్వీట్ సారాంశం.

ఇది చూసిన వరుణ్ వెంటనే ఆసుపత్రికి ఫోన్ చేసి, వెరిఫై చేసుకోని వెంటనే చర్యకు దిగాడు. బెంగుళూరు పోలీసు కమిషనర్ శ్రీ. కమల్ పంత్‌కు ఫోన్ చేసి పరిస్థితిని వివరించారు. సంబంధిత అధికారులు అప్రమత్తమవుతారని కమిషనర్ అతనికి వెంటనే హామీ ఇచ్చారు.

ఇంతలో, ఫిల్లింగ్ స్టేషన్ వద్ద ఉన్న హాస్పిటల్ ఆక్సిజన్ ఫిల్లింగ్ వాహనాలకు భారీ క్యూ ఉందని, అలాగే యూనిట్ ఉద్యోగులు ఆక్సిజన్ నింపడానికి తెల్లవారుజాము వరకు సమయం పడుతుందని చెప్పారు.

మరోసారి వరుణ్ అభ్యర్ధించగా ఎసిపి శ్రీ అజయ్ కుమార్ చాలా వేగంగా స్పందించారు. ఎనిమిది మంది ప్రాణాలు ప్రమాదంలో ఉన్నందున వెంటనే అక్కడి స్థానిక పోలీసులను పంపించి, ఆసుపత్రిలో ఒక వాహనాన్ని నింపడానికి ప్రాధాన్యత ఇవ్వాలని ఆదేశించారు. ఆసుపత్రి ఆక్సిజన్ అవసరాన్ని అధిక ప్రాధాన్యత ఆధారంగా తీర్చడానికి ACP వ్యక్తిగతంగా ఆక్సిజన్ ఫిల్లింగ్ యూనిట్‌తో మాట్లాడి సమన్వయం చేశారు. ఇవన్నీ వరుణ్ నిరంతరం ఆసుపత్రి మరియు ఆక్సిజన్ ఫిల్లింగ్ యూనిట్‌తో సంప్రదిస్తూ అవసరమైన సరఫరాను ఆసుపత్రికి పంపించేలా చూసుకున్నారు. అర్ధరాత్రి ఎనిమిది మంది ప్రాణాలను రక్షించడంలో వరుణ్ సహాయం చేశారు.

ఈ కష్ట సమయంలో నిస్వార్థంగా తమ సేవలను అందిస్తున్న వరుణ్ లాంటి హీరోలు ఇంకా ఎంతో మందికి ఆదర్శం కావాలి.

Exit mobile version