Home రాజకీయం ఇది బీసీలపై ఉన్మాద చర్య – భగ్గుమన్న టిడిపి 

ఇది బీసీలపై ఉన్మాద చర్య – భగ్గుమన్న టిడిపి 

TDP comments on ysrcp over BC issue

TDP comments on ysrcp over BC Reservations:

ఎపి సర్కార్ లో  ఎక్కడ చిన్న తప్పు దొర్లుతుందా ఏకి పారేద్దామా అని ఎదురుచూస్తున్న టీడీపీ తాజాగా బిసిల అంశాన్ని ప్రస్తావించింది. టీడీపీ జాతీయ అధ్యక్షుడు చంద్రబాబు స్పందిస్తూ, ‘‘బీసీల పట్ల వైసీపీ ప్రభుత్వం ఉన్మాదంగా వ్యవహరిస్తోంది. పూలే, ఎన్టీఆర్‌ ఆదర్శాలను వైసీపీ కాలరాస్తోంది. బీసీ రిజర్వేషన్లు 34 శాతం నుంచి 24 శాతంకు తగ్గింపు వైసీపీ ఉన్మాద చర్య’అని ధ్వజమెత్తారు.  దీనిపై అన్ని మండల కేంద్రాల్లో నిరసనలు తెలపాలి. అన్ని నియోజకవర్గాల్లో ఆందోళనలు జరపాలి. దీనిపై ఇప్పటికే బీసీ ప్రత్యేక బృందాన్ని ఢిల్లీకి పంపాం. సుప్రీం కోర్టులో స్పెషల్‌ లీవ్‌ పిటీషన్‌ వేస్తున్నాం. అటు న్యాయపోరాటాన్ని, ఇటు ప్రజాపోరాటాన్ని ఉధృతం చేయాలి’’ అని పార్టీ శ్రేణులకు  పిలుపు ఇచ్చారు.

‘‘టీడీపీ అంటే బీసీ.. బీసీ అంటే టీడీపీ. అందుకే జగన్‌ బీసీలపై కక్ష సాధిస్తున్నారు. బీసీ రాజకీయ సాధికారతకు వైసీపీ సమాధి కడుతోంది’’ అని చంద్రబాబు  ధ్వజమెత్తారు. మౌనంగా ఉంటే వైసీపీ ఉన్మాదం పెట్రేగిపోతోందన్నారు. బీసీల హక్కుల రక్షణ కోసం ఉద్యమించాలని, బీసీ రాజకీయ సాధికారతను కాపాడుకోవాలని, 34 శాతం బీసీ రిజర్వేషన్‌ను కాపాడుకోవాలని సూచించారు. బీసీలు పోరాడి సాధించుకున్న హక్కు 34శాతం రిజర్వేషన్‌ అనీ, ఇప్పుడు పోగొట్టుకుంటే తిరిగి రాదని స్పష్టం చేశారు.

బిసిల రిజర్వేషన్ ని  తాకట్లు పెట్టే అధికారం, పొట్టకొట్టే అధికారం వైసీపీకి ఎంతమాత్రం లేదని చంద్రబాబు స్పష్టంచేశారు.   స్థానిక సంస్థల్లో 10 శాతం రిజర్వేషన్‌ కోత విధించిన వైసీపీకి బీసీలు తగిన గుణపాఠం చెప్పాలని టీడీపీ రేపల్లె ఎమ్మెల్యే అనగాని సత్యప్రసాద్‌ మరోపక్క  పిలుపిచ్చారు. 50 శాతం రిజర్వేషన్లు మించకూడదనే హైకోర్టు తీర్పును అడ్డుగా పెట్టుకుని బీసీలకు జగన్‌ తీరని అన్యాయం చేశారని.. 60 శాతం రిజర్వేషన్‌ కోసం ప్రభుత్వం సుప్రీం కోర్టుకు వెళ్లాలని టీడీఎల్పీ ఉపనేత నిమ్మల రామానాయుడు పాలకొల్లులో డిమాండ్‌ చేశారు.

Exit mobile version